Koreya kompaniyalari Oʻzbekistondagi raqamli loyihalar va kadrlar tayyorlash jarayonlariga qoʻshilishi mumkin

Koreya Respublikasiga rasmiy tashrifi chogʻida Tanzila Narbayeva biznes, raqamli kompaniyalar vakillari hamda Bandlik va mehnat vaziri Kim Yung Hun bilan muzokaralar oʻtkazdi.

Janubiy Koreya Ayol-tadbirkorlar uyushmasi raisi Pak Chan Suk bilan uchrashuvda ikki mamlakat ishbilarmon ayollari oʻrtasidagi aloqalarni kengaytirish masalasi muhokama qilindi. Uyushma qariyb 3,5 million nafar ayol-tadbirkorni birlashtiradi. The Skin, Sooho Global va Metal Heater Solution kompaniyalari kosmetika sanoati, eksport, marketing, suv taʼminoti va ekologik toza mahsulotlar ishlab chiqarish yoʻnalishlarida hamkorlik qilishni taklif etdi.

Narbayeva NAVER Corporation va Kakao Corporation vakillari bilan ehtimoliy qoʻshma loyihalarni muhokama qildi. Suveren sunʼiy intellekt, elektron toʻlovlar, raqamli davlat xizmatlari va startaplarni rivojlantirish masalalari koʻrib chiqildi. Koreya kompaniyalari Oʻzbekistonda raqamli iqtisodiyot rivojlanayotganini va yosh mutaxassislar salohiyatini qayd etdi. Ular bunday hamkorlik imkoniyatlarini bosqichma-bosqich oʻrganishga tayyorligini bildirdi.

Reklama

Tomonlar, shuningdek, bandlik, mehnat migratsiyasi va Oʻzbekiston fuqarolarining huquqlarini himoya qilish masalalarini koʻrib chiqdi. Ehtimoliy yoʻnalishlar qatoridan koreyalik kompaniyalarni jalb etish, ish beruvchilar talablariga mos kadrlar tayyorlash va shaffof tanlov asosida ishga joylashtirish oʻrin oldi. BMT Global akseleratori tashabbusi doirasida norasmiy bandlikni qisqartirish, ijtimoiy himoya va yoshlarni kasbga tayyorlash masalalari ham muhokama qilindi.

Koreya tomoni Janubiy Koreyada ishlayotgan oʻzbekistonliklarning mehnat huquqlarini himoya qilish, ularni tibbiy sugʻurta bilan taʼminlash va kompensatsiya toʻlovlari masalalarida yordam berishga tayyorligini bildirdi.