Google Gemini siz haqingizda eslab qolganlar jamlanmasini joriy eta boshladi

Yangi funksiya Geminiʼning veb-versiyasida Settings > Personal Intelligence boʻlimida paydo boʻldi. Unda servis toʻplagan maʼlumotlar toifalar boʻyicha koʻrsatiladi: foydalanuvchi haqidagi asosiy maʼlumotlar, karyera va ish loyihalari, sayohatlar va kundalik yumushlar, koʻngilochar mashgʻulotlar, fitnes va turmush tarzi.

Foydalanuvchi maʼlumotlarni matn maydoni orqali qoʻshishi yoki oʻchirishi mumkin. Masalan, Geminiʼdan odam yapon tilida gapirishini eslab qolishni yoki eski telefon raqamini xotiradan olib tashlashni soʻrash mumkin. Agar soʻrov noaniq boʻlsa, jamlanma maʼlumotlarining aniqligini taʼminlash uchun servis aniqlashtiruvchi savollar berishi mumkin.

Yuqori oʻng burchakdagi qalam belgisi kengroq tahrirlash imkoniyatini ochadi. Uch nuqtali menyudagi Memory history boʻlimida muayyan maʼlumotlar qachon qoʻshilgani yoki oʻzgartirilgani koʻrsatiladi.

Funksiya ishlashi uchun Keep Activity va Memory yoqilgan boʻlishi kerak. Google hozircha uni Geminiʼning Android va iOS ilovalarida taqdim etmadi; kutilishicha, u yerdagi interfeys veb-versiyadagiga oʻxshash boʻladi.