FIA «Formula-1» texnik reglamentini ishlab chiqishda sunʼiy intellektni joriy etadi

FIA Amazon Web Services bilan hamkorlikda «Formula-1»ning yangi texnik reglamentini tayyorlashda sunʼiy intellektdan faolroq foydalana boshlashini maʼlum qildi.

FIAning «Formula-1» boʻyicha texnik direktor oʻrinbosari Dominik Harlou tashkilot hisoblash gidrodinamikasi (CFD) maʼlumotlari asosida oʻqitilgan surrogat modellarni koʻrib chiqayotganini aytdi. Ular simulyatsiyalarni tezlashtirishi, shuningdek, hisoblash resurslari, muhandislar vaqti, energiya hamda moliyaviy xarajatlarga boʻlgan ehtiyojni kamaytirishi kerak.

Shuningdek, sunʼiy intellektdan xavfsizlik, energiyani boshqarish va qoidalarga muvofiqlik haqidagi maʼlumotlarni qayta ishlash, shuningdek, tasvirlar va videolarni tahlil qilishda foydalanish rejalashtirilmoqda. Harlouning soʻzlariga koʻra, bunday vositalar dvigatel mutaxassislariga kuch qurilmasi ishida yuzaga keladigan anomaliyalarni aniqlash va katta hajmdagi maʼlumotlar toʻplamlaridagi qonuniyatlarni topishga yordam beradi.