Macronix Nintendo Switch kartrijlari uchun ROM ishlab chiqarishni bosqichma-bosqich toʻxtatadi

Macronix oʻtgan chorak yakunlari boʻyicha ishlab chiqarish ustuvorliklarini oʻzgartirishini maʼlum qildi. Kompaniya portativ Switch konsollari kartrijlarida ishlatiladigan ROM xotirasini ishlab chiqarishdan bosqichma-bosqich voz kechib, maʼlumotlar markazlariga NOR Flash yetkazib berishni oshirmoqchi.

Joriy yilning uchinchi choragida Macronixʼning ROM chiplari boʻyicha tushumi oʻtgan yilning shu davriga nisbatan 39 foizga kamaydi. Shu davrda NOR Flash savdosi 158 foizga, NAND savdosi esa 768 foizga oshdi.

Macronix boshqaruv kengashi raisi va bosh direktori Miin Wu maʼlumotlar markazlari tomonidan NOR Flashʼga talab juda yuqoriligicha qolayotganini aytdi. Uning soʻzlariga koʻra, mijozlar kompaniya ushbu xotira asosidagi yechimlarni koʻproq yetkazib bera olishi uchun ishlab chiqarish quvvatlarini kengaytirishni talab qilmoqda. Macronix xotira chiplari narxlari yanada oshishini ham kutmoqda.

Nintendo avvalroq jismoniy tashuvchilardagi oʻyinlardan voz kechmoqchi emasligini bildirgan. Avgust oyida kompaniya oʻyinlar umumiy savdosi hajmining 38,5 foizi kartrijlarga toʻgʻri kelganini maʼlum qilgan. Bu koʻrsatkich Capcom kabi boshqa kompaniyalarnikidan yuqori. Sony esa, aksincha, PlayStation uchun oʻyinlarni jismoniy tashuvchilarda chiqarishdan voz kechish niyatini eʼlon qilgan.