Oʻzbekiston IT sektoriga Rossiya investitsiyalari ikki yil ichida uch baravar oshdi
Rossiyaning Oʻzbekiston IT sektoriga toʻgʻridan-toʻgʻri investitsiyalari ikki yil ichida uch baravar oshib, 320 mln dollarga yetdi. Mamlakatda vakolatxonalariga ega Rossiya IT kompaniyalari soni 47 taga yetdi.
«Milliy strategik tahlil va iqtisodiyotni rivojlantirish instituti» avtonom notijorat tashkiloti bosh direktori Kirill Petrov sanoatni raqamlashtirish va sunʼiy intellektni joriy etishni Rossiya va Oʻzbekiston oʻrtasidagi hamkorlikning istiqbolli yoʻnalishlari deb atadi.
Petrovning soʻzlariga koʻra, 2025 yil yakunlari boʻyicha raqamli yechimlar va sunʼiy intellekt texnologiyalari savdosi hajmi 210 mln dollarga yetib, bir yil ichida 64 foizga oshgan. U bunday ishlanmalarga talabning ortishini respublika sanoatining rivojlanishi bilan bogʻladi.
Mutaxassis bunga misol sifatida Olmaliq kon-metallurgiya kombinatini keltirdi. Uning Raqamli boshqaruv markazida sunʼiy intellekt asosidagi tizim ishlaydi. Tizim uchta mis boyitish fabrikasidagi jarayonlarni nazorat qiladi va 20 mingdan ortiq uskuna birligidan olingan maʼlumotlarni tahlil qiladi. «Raqamli Olmaliq KMK — 2030» strategiyasi doirasida raqamlashtirish loyihalari, jumladan, ekskavatsiya uchun maqbul yoʻnalishlarni mustaqil ravishda belgilaydigan «Raqamli kon» tizimi amalga oshirilmoqda.
Petrovning fikricha, rossiyalik muhandislar oʻz texnologik ishlanmalarini Oʻzbekiston korxonalari va energetika sektoriga taklif qilishi mumkin. Uning baholashicha, Oʻzbekiston kelgusi besh yil ichida energetika majmuasini rivojlantirishga 4 mlrd dollardan ortiq mablagʻ kiritmoqchi. Ekspert buni raqamlashtirish va sunʼiy intellektdan foydalanish sohalaridagi hamkorlik uchun qoʻshimcha imkoniyat deb hisoblaydi.
Rossiya Oʻzbekistonning hajmi boʻyicha ikkinchi yirik savdo hamkori boʻlib qolmoqda: respublikaning tashqi savdo aylanmasining 16,6 foizi uning hissasiga toʻgʻri keladi. Texnologik hamkorlik qoʻshma ishlab chiqarishlar, logistika loyihalari va anʼanaviy savdo bilan bir qatorda rivojlanmoqda.
