Sunʼiy intellektning iqtisodiy samarasi «Muhtasham yettilik»da jamlandi

Apollo Global Management bosh iqtisodchisi Torsten Slok tadqiqotida inflyatsiya hisobga olingan holda bir xodimga toʻgʻri keladigan tushum va rentabellikning oʻsishi faqat «Muhtasham yettilik» — Nvidia, Tesla, Amazon, Microsoft, Google (Alphabet), Apple va Meta✴ kompaniyalarida sezilayotganini taʼkidlaydi. Uning baholashicha, S&P 500 indeksidagi qolgan 493 ta kompaniyada bu koʻrsatkichlar oʻzgarmagan.

Slok sunʼiy intellektning unumdorlikka sezilarli taʼsir koʻrsatganidan darak beruvchi belgilarni aniqlamadi. Uning qayd etishicha, anʼanaviy kompaniyalarga eng yangi modellar kerak emas va ular bunday modellar uchun katta mablagʻ toʻlashga tayyor emas, startaplar esa venchur investorlar koʻmagida xarajatlarini oshirishda davom etmoqda. Agar sunʼiy intellektdan foydalanish iqtisodiyotning kichik bir qismida jamlanib qolsa, uning makroiqtisodiy taʼsiri cheklangan boʻladi.

Slokning fikricha, modellar vaqt oʻtishi bilan ommaviy standartlashtirilgan mahsulotga aylanib, arzonlashishi mumkin, biroq tushum va rentabellikni oshirish koʻringanidan qiyinroq boʻladi. Gartner tahlilchilari ham 2030 yilga borib sunʼiy intellekt infratuzilmasiga kiritilgan 3,5 trln dollardan ortiq investitsiyalar qadrsizlanishi mumkinligini taxmin qildi, boshqa iqtisodchilar esa unumdorlikning oshishi hisobiga bu investitsiyalar oʻzini oqlashini kutmoqda.