Nurafshondagi Kelajak texnologiyalari markazi korxonalari IT Park imtiyozlarini oladi
Nurafshonda Kelajak texnologiyalari markazi tashkil etiladi, korxonalari IT Park imtiyozlarini oladi. Yuqori texnologiyali ishlab chiqarishlar butlovchi qismlar import bojlaridan ozod qilinadi.
Nurafshonda robotlar, elektronika va texnologik asboblarni ishlab chiqadigan hamda ishlab chiqaradigan kompaniyalar uchun yagona maydon tashkil etiladi. Loyiha prezident Shavkat Mirziyoyevning elektrotexnika sohasi investorlari va tadbirkorlari bilan uchrashuvida muhokama qilindi.
Markaz korxonalari IT Park rezidentlariga beriladigan imtiyozlardan foydalanishi mumkin. Robototexnika, elektronika va texnologik asboblar uchun materiallar hamda butlovchi qismlar import bojlaridan ozod qilinadi. Yuqori texnologiyalar sohasidagi ilmiy ishlanmalardan olinadigan daromadlar soliqqa tortilmaydi.
Hokimiyat organlariga qoʻshilgan qiymati yuqori mahsulotlar ishlab chiqarishni yoʻlga qoʻyish topshirildi. Toshkentda serverlar, interaktiv panellar va sensorli datchiklar, Andijonda ofis texnikasi va kabel toʻplamlari, Qashqadaryoda esa televizorlar uchun elektron platalar ishlab chiqarish rejalashtirilmoqda.
Ahangaron texnoparkida Eltech kompaniyasining mikroprotsessor modullarini ishlab chiqarish korxonasi allaqachon faoliyat yuritmoqda. Toshkentda koreyalik hamkorlar ishtirokida gumanoid robotlar zavodi qurilmoqda. Yagona ekotizimni yaratish korxonalarni mikroelektronika asosidagi zamonaviy vositalar va sanoat robotlari bilan taʼminlashi kerak.
Prezidentning baholashicha, yangi tashabbuslar ichki talabni qoplashga yordam beradi va 5 milliard dollarlik eksport uchun imkoniyatlar yaratadi. Muhokamada 100 dan ortiq mahalliy va 10 nafardan ziyod xorijiy investor qatnashdi.
Yana oʻqing
Fractile AI chiplari ishlab chiqish uchun $720 mln jalb qildi
Biznes va pul15:48
Ilon Mask Germaniyaning Singulus kompaniyasidan Starmind uchun €60 mlnlik elementlar buyurtma qildi
Biznes va pul13:39