Steamʼda oktabr oyidagi yangi oʻyinlarning deyarli yarmi generativ AI bilan yaratildi
Oktabrda Steamʼdagi yangi oʻyinlarning 49,9 foizida AI ishlatilgani koʻrsatilgan. Bu majburiy oshkor qilish joriy etilgandan beri 63 000 dan ortiq reliz tahlili natijasidir.
Reddit foydalanuvchisi u/ploz tahliliga koʻra, Steamʼda AI ishlatilgani oshkor qilingan oʻyinlar ulushi izchil oshib bormoqda. Majburiy belgilar joriy etilganida bu koʻrsatkich 1,7 foiz edi, oktabrda esa 49,9 foizga yetdi. Keyinchalik Valve qoidalarni oʻzgartirdi: endi ishlab chiquvchilar, avvalo, oʻyinchilar koʻradigan yoki eshitadigan AI kontentini oshkor qilishi kerak.
Bunday belgilar kichik loyihalarda koʻproq uchragan: oʻnta ham sharhi boʻlmagan oʻyinlar orasida ularning ulushi 47 foizni tashkil etgan. Eng ommabop oʻyinlarda esa bu koʻrsatkich pastroq — 14 foiz.
Ishlab chiquvchilar koʻpincha AIʼdan tasvirlar va boshqa badiiy materiallar yaratishda foydalanganini koʻrsatgan. Shuningdek, undan matn va tarjimalar tayyorlash, doʻkon sahifalarini bezash, marketing, musiqa va kod yozishda foydalanilgan. Ovozlar va oʻyin jarayonidagi kontentni generatsiya qilish ancha kam uchragan. Tahlil faqat ishlab chiquvchilar oʻzlari xabar bergan holatlarni hisobga oladi, shu sababli unda oshkor qilinmagan AI ishlatilishi qamrab olinmagan.
Yana oʻqing
Tencent Hy4’ni taqdim etdi: model kompyuterni boshqarishda GPTdan oʻzdi
Modellar va mahsulotlar15:50
Yangi AI modeli Palette taqdimotlar testining ikki toifasida birinchi oʻrinni egalladi
Modellar va mahsulotlar14:41