CAA va Ogilvyʼning yangi platformasi yulduzlarning raqamli nusxalari yordamida reklama koʻlamini kengaytirishga imkon beradi

Ogilvy va CAA agentligi mashhurlarning raqamli qiyofalari ishtirokidagi reklama materiallarini yaratish uchun ECHO qoʻshma platformasini ishga tushirdi. Tizim postprodakshnning standart vositalariga ulanadi va loyihada qatnashishga rozilik bergan mijozlarning raqamli qiyofalari, ovozlari hamda intellektual mulki saqlanadigan CAA Vault bazasidan foydalanadi.

Kompaniyalar bayonotiga koʻra, sakkiz–10 ta reklama materialini qisqa suratga olish jarayoni 30 dan 50 tagacha tayyor variant yaratishi mumkin, ular orasida TikTok trendlariga moslashtirilgan variantlar ham bor. Bunday yondashuv xarajatlarni 75 foizgacha kamaytirib, reklama tayyorlashni tezlashtirishi mumkin, biroq har bir materialning oʻzi mashhur shaxs tomonidan maʼqullanishi kerak. Avtomatik tekshiruvlar yaratilgan kontentni shartnoma shartlari va brend xavfsizligi talablariga solishtiradi.

Isteʼmolchilar uchun moʻljallangan barcha materiallarda «[Mashhur shaxs nomi] Approved | Recreated with AI» suv belgisi koʻrinib turadi. CAA loyihada qatnashishga rozi boʻlgan taniqli mijozlaridan qaysi biri ekanini oshkor qilmadi. Kompaniyalar ECHOʻni deepfakeʼlar va sunʼiy intellektdan ruxsatsiz foydalanish borasidagi xavotirlar saqlanib qolayotgan bir paytda mashhurlarning raqamli nusxalaridan reklamachilikda ixtiyoriy foydalanish uchun infratuzilma sifatida taqdim etmoqda.