Google kiberxavfsizlik uchun Gemini 4 Carbonʼni eʼlon qildi
Google bayonotiga koʻra, Carbon yangilangan Artificial Analysis Intelligence Index reytingida boshqa modellarni ortda qoldirib, birinchi oʻrinni egalladi.
Kompaniya kiberxavfsizlik, dasturlash va uzoq davom etuvchi agentli ssenariylar uchun moʻljallangan Gemini 4 Carbon modelini eʼlon qildi. Dastlab model kiberhimoya boʻyicha mutaxassislarning cheklangan guruhiga taqdim etiladi, keyin esa undan foydalanish imkoniyati Fairwind Program orqali bosqichma-bosqich kengaytiriladi. Ishlab chiquvchilar, biznes va oddiy foydalanuvchilar uchun modelni taqdim etish kompaniya tomonidan himoya mexanizmlari qoʻshimcha tekshirilganidan keyinroq rejalashtirilgan.
Himoya cheklovlarisiz oʻtkazilgan tashqi testlarda Carbon zaifliklarni aniqlash boʻyicha SEC-bench Pro sinovida 88,2 foiz, ulardan foydalanish mumkinligini tekshirish boʻyicha ExploitGymʼda 54,8 foiz va tuzatishlar tayyorlash boʻyicha CWE-benchʼda 71,0 foiz natija qayd etdi. Kompaniya, shuningdek, ichki ssenariylarda xavfsiz kod sifati oshgani va xatti-harakatlardagi jiddiy ogʻishlar kamayganini maʼlum qildi.
Modelning boshlangʻich narxi bir million kirish tokeni uchun 2 dollar va bir million chiqish tokeni uchun 10 dollarni tashkil etadi. Googleʼning taʼkidlashicha, Carbon koʻp bosqichli muhandislik vazifalari uchun moʻljallangan boʻlib, xatolar sabablarini aniqlash va kodni tuzatishni ham oʻz ichiga olgan holda, bir necha kun davomida ishlashni davom ettira oladi.
