Fitch Uztelecom reytingini ijobiy prognoz bilan «BB» darajasigacha oshirdi

Agentlik 2026-yil 9-noyabrdagi xabarida qayta koʻrib chiqishga kelgusi ikki yil ichida erkin pul oqimining kutilayotgan oʻsishi va qarz yukining bosqichma-bosqich kamayishi sabab boʻlganini bildirdi. Tahlilchilarning baholashicha, bunga operatorning ichki bozordagi kuchli mavqei, abonentlar bazasining kengayishi va qarz darajasining moʻtadilligi yordam beradi.

Kompaniya reytingi Oʻzbekistonning «BB» darajasidagi suveren reytingiga tenglashtirilgan, davlat tomonidan qoʻllab-quvvatlanish esa nihoyatda ehtimoliy deb baholanmoqda. Davlat Uztelecom aksiyalarining 94 foiziga egalik qiladi, strategiyaning asosiy yoʻnalishlari, investitsiyalar va axborot xavfsizligi sohasidagi asosiy funksiyalarni belgilaydi. Bundan tashqari, hukumat kompaniya tashqi qarzining qariyb 43 foizini kafolatlaydi; agentlik kutishicha, 2027-yil oxiriga borib bu ulush 50 foizdan oshadi.

2026-yil sentabr oyi oxirida Uztelecom mobil aloqa bozorining qariyb 32 foizini va internetga statsionar keng polosali ulanish bozorining 85 foizini egallagan. Shu bilan birga, infratuzilmaga yoʻnaltirilayotgan investitsiyalar erkin pul oqimini cheklamoqda: bazaviy ssenariyga koʻra, kapital xarajatlar 2026-yilda tushumning 49 foiziga yetishi, 2028-yilda taxminan 27 foizgacha, 2029-yilgacha esa qariyb 20 foizgacha kamayishi mumkin.

Reklama

Prognozga koʻra, EBITDAga nisbatan sof qarz yuki 2025-yildagi 2,3 baravardan 2026-yilda 2,8 baravargacha oshadi, keyin esa 2028-yilgacha 2,6 baravargacha pasayadi. Koʻrsatkichning uch baravardan past darajada saqlanishi mustaqil kredit profilini «bb» darajasida qoʻllab-quvvatlaydi. Qarzning qariyb 90 foizi xorijiy valyutada ifodalangan, tushumning asosiy qismi esa soʻmlarda keladi; kompaniya xedjirlash vositalaridan foydalanmaydi.

Uztelecom xususiylashtirish doirasida ehtimoliy xalqaro IPOga tayyorgarlik koʻrmoqda. Agentlik baholashicha, davlat aksiyalarning nazorat paketini saqlab qolsa, joylashtirishning oʻzi reytingga taʼsir qilmaydi.