Sunʼiy intellekt juda qimmatga tushdi: SoftBank chorakda $7 mlrd zarar koʻrdi

SoftBank chorakda 1,12 trln iyen sof zarar koʻrdi. Bir yil avval kompaniya 2,5 trln iyen sof foyda olgan edi. Tushum 2,22 trln iyenga yetdi, tahlilchilar prognozi esa 2,02 trln iyen edi. 30-sentabrda yakunlangan olti oyda tushum telekommunikatsiya biznesi va SI hisoblash segmenti hisobiga 13,3 foizga oshdi.

Shu olti oylik davrda SoftBank 597,2 mlrd iyen zarar koʻrdi. Kompaniya buni AQShdagi SI maʼlumotlar markazlari uchun energetika uskunalarini xarid qilish rejalarining oʻzgarishi bilan bogʻladi. Tanqislik xavfi va yetkazib berish muddatlarining uzoqligi sabab kompaniya boʻlajak obyektlarni energiya bilan taʼminlash uchun oldindan mablagʻ kiritdi. Sentabr oxiriga kelib, bunday uskunalar uchun jami toʻlovlar $9,48 mlrdga yetdi.

Vision Fund segmenti chorakni 81,58 mlrd iyen zarar bilan yakunladi, bir yil avval esa 2,38 trln iyen foyda koʻrsatgan edi. Natijaga Coupang va Grab kabi birjada roʻyxatga olingan kompaniyalar aksiyalari kotirovkalarining pasayishi taʼsir qildi.

Reklama

Sentabr oxirida SoftBankning OpenAIʼga jami investitsiyalari $54,6 mlrdni, ularning adolatli qiymati esa $99,6 mlrdni tashkil etdi. Bu $45 mlrd miqdoridagi investitsion foydani anglatadi. Moliyalashtirishning yangi raundidan keyin OpenAI bahosining ehtimoliy oshishi hozircha hisobga olinmagan: bu haqda hali rasmiy eʼlon berilmagan. SoftBank ushbu natijani joriy chorak yakunlarida aks ettirishi mumkin.

Kompaniya OpenAI bilan Ogayo shtatidagi maʼlumotlar markazi loyihasi uchun 8 GVt quvvat taqdim etishni nazarda tutuvchi 20 yillik ijara shartnomasi tuzilganini ham maʼlum qildi. SoftBank Texasdagi boʻlajak maʼlumotlar markazi uchun yopiq konturli, issiqlikni havoga chiqaradigan sovitish tizimi orqali suv sarfini kamaytirish, mahalliy mutaxassislarni jalb qilish va mahalliy resurslardan foydalanishni rejalashtirmoqda.