Reddit foydalanuvchisi AI yordamida Switch oʻyinlarini Apple TVʼda nativ ishga tushirdi

TVPort — oʻyinlarni qayta kompilyatsiya qilish orqali konsolga koʻchiruvchi nxnative vositalar toʻplamining forki. Muallifning aytishicha, u loyihani yaratishda Claude Opus 5.5’dan foydalangan. Vosita oʻyin saqlovlarining zaxira nusxalarini Mac yoki iCloudʼda saqlashi, shuningdek, moʻljallangan kadrlar tezligini — sekundiga 30 yoki 60 kadrni — tanlash imkonini beradi.

Taʼkidlanishicha, Super Mario Odyssey Apple TV 4Kʼda sekundiga 60 kadr tezlikda ishlaydi. Baʼzan mayda qotishlar paydo boʻladi, sharsharalar yaqinida esa ovoz notoʻgʻri ishlashi mumkin. Animal Crossing: New Horizons sekundiga 30 kadr bilan cheklangan; loyiha muallifi oʻyin ishlashida muammolarga duch kelmaganini aytgan.

The Legend of Zelda: Tears of the Kingdom hozircha qoʻshimcha ishlov berishni talab qiladi. Sinovlar vaqtida Apple TV qizib ketib, unumdorligini pasaytirgan. Muallifning baholashicha, ogʻir oʻyinlarni ishga tushirish uchun chuqur diagnostika va oʻyin dvigatelini qisman qayta ishlash kerak boʻlishi mumkin. U TOTKʼni uchinchi avlod Apple TV 4Kʼda ishga tushirib boʻlmasligi ehtimolini ham istisno qilmagan.

Reklama

TVPort repozitoriyasida oʻyin fayllari yoʻq. Tajriba oʻtkazish uchun foydalanuvchi oʻziga tegishli Switch kartridjlaridan qonuniy olingan nusxalarni mustaqil ravishda tayyorlashi kerak.

Oʻyinlarni dekompilyatsiya qilish va koʻchirishda AIʼdan foydalanish bahsli boʻlib qolmoqda. Avvalroq decomp.dev sayti yaratuvchilari uning yopilishini eʼlon qilib, AIʼdan vijdonsiz foydalanish sabab hamjamiyatda muammolar yuzaga kelganini tushuntirgan. Keyinroq Anthropic mavjud oʻyinlarni qayta yaratish uchun Claude Codeʼdan foydalanmaslikni soʻragan.