Chipta savdosidan vokalgacha: konsertlarda SIʼdan foydalanishning «taʼsirchan» usullari

Peel It Back gastrolida Nine Inch Nails guruhi ilk bor L-Acousticsʼning Source Intelligence tizimidan foydalandi. Generativ boʻlmagan mashinaviy oʻqitishga asoslangan texnologiya real vaqt rejimida ijrochining ovozini sahnadagi fon shovqinidan ajratib, tomoshabinlar uni yanada tiniq eshitishini taʼminlaydi. Ovoz rejissyori Jamie Pollock soʻzlariga koʻra, yechim butun gastrol davomida ommaga eʼlon qilinmagan holda qoʻllangan.

SI konsert marketingini ham oʻzgartirmoqda. Laylo va HIVE artistlar jamoalariga SMS, email va reklama kampaniyalarini tayyorlashda yordam beradi, Laylo esa qoʻshimcha ravishda foydalanuvchilar videolarini saralab, ulardan foydalanish uchun ruxsat soʻraydi. HIVE maʼlum qilishicha, ayrim mijozlar allaqachon marketing assistentlariga barcha xatlar, SMSlar va Metaʼdagi kampaniyalarni tayyorlashni topshirmoqda.

Ticketmaster konsertlarni izlash uchun ChatGPT va Claudeʼni uladi: foydalanuvchilar platformada xaridga oʻtishdan oldin artistlarning gastrollari haqida bilib, joylarni koʻrishi mumkin. Kompaniya botlarni aniqlash uchun ham mashinaviy oʻqitishdan foydalanadi. Muammo RAYEʼning Londondagi Royal Albert Hallʼdagi chiqishi bilan bogʻliq holat fonida yaqqol koʻrindi: sigʻimi 5 000 oʻrin boʻlgan shou uchun oldindan sotuvga 1,8 mln ariza roʻyxatdan oʻtkazilgan, xonanda soʻzlariga koʻra, ularning yuz minglab qismi soxta boʻlgan.

SeatGeek oktabr oyida TourIQ vositasini ishga tushirdi. U gastroldagi har bir shahar va maydonni tahlil qilib, soʻng har bir joy uchun narx taklif qiladi. Hollywood Bowlʼda 26 ta L-Acoustics kolonkadan iborat yangi tizim ilk bor 20 iyun kuni ishga tushdi; maydon Source Intelligence va L-ISA immersiv texnologiyasidan foydalanadi. Ishlab chiquvchining baholashicha, yechimdan Bruno Mars, Rüfüs Du Sol va Harry Styles ham foydalanishni boshlab yuborgan.