Bain Capital koʻchmas mulk boʻlimi rahbari fond strategiyasini tushuntirdi
Bain Capital koʻchmas mulk boʻlimi rahbari Rayan Kotton bozor beqarorligi sharoitida fond uzoq muddatli investitsiyalar va muqobil obyektlarga tayanishini aytdi.
Kotton koʻchmas mulk sohasidagi 18 mlrd dollarlik aktivlarni boshqaradi. Uning fikricha, AQSh bozori takroriy silkinishlarga duch kelmoqda: investorlar obyektlar qiymatini qayta baholab, bitimlarni kechiktirmoqda va ularning hajmini qisqartirmoqda.
Uning soʻzlariga koʻra, juda past stavkalar davridan keyin yuzaga kelgan taklif ortigʻi ham sohaga taʼsir qilmoqda. Sunʼiy intellekt ofislar, logistika va taʼminot zanjirlariga boʻlgan talabni oʻzgartirmoqda, shuningdek, boylik qayerda yaratilishi va sarflanishiga taʼsir koʻrsatmoqda.
Bain Capital koʻchmas mulkni 10 yillik ufqda koʻrib chiqadi va aktivlarni tezda qayta sotishga urinmasdan, talabning barqaror omillarini baholaydi. Kottonning aytishicha, bunday yondashuv fondning ofislar, savdo markazlari hamda aholi koʻchib ketishi yoki taklif ortigʻi kuzatilayotgan ayrim koʻp xonadonli uy-joy bozorlariga qiziqishini kamaytiradi.
Buning oʻrniga fond muqobil segmentlarga eʼtibor qaratmoqda: keksalar uchun uy-joy, individual saqlash omborlari va talabalar turar joyi. Kotton torroq yoʻnalishlar qatorida xususiy samolyotlar angarlari hamda qayiq va yaxtalar uchun marinalarni tilga oldi. U bu sohalarga qiziqishning sabablarini boylikning oshishi, taklifning cheklangani va yangi obyektlar yaratishdagi toʻsiqlar bilan izohladi.
Kottonning baholashicha, hozir dunyo boʻyicha koʻchmas mulkka kiritiladigan investitsiyalarning qariyb 82 foizi toʻrtta anʼanaviy segmentga toʻgʻri keladi: koʻp xonadonli uy-joy, ofislar, chakana savdo va sanoat koʻchmas mulki. Shu bilan birga, dunyodagi eng yirik 10 ta koʻchmas mulk fondining yettitasi maʼlumotlar markazlari va keksalar uchun uy-joyni ham oʻz ichiga olgan muqobil toifalarda ishlaydi.
