Andrey Karpaty sunʼiy intellekt yordamida ikki soatda Hacker News asosidagi videoxizmat yaratdi

Loyiha gʻoyasi YouTube tavsiyalaridan navbatdagi bor koʻngli qolganidan keyin paydo boʻldi. Karpaty mashhur platforma algoritmlaridan voz kechib, ularning oʻrniga Hacker News texnologik hamjamiyatining jamoaviy tanlovidan foydalanishga qaror qildi.

Buning uchun Claude Code 2007-yildan 2026-yilgacha boʻlgan davrni qamrab olgan Hacker News muhokamalari arxivini tahlil qildi. YouTube tilga olingan qariyb 40 mingta izohdan tizim 150 ta mavzuli yoʻnalish boʻyicha 6 454 ta videoni saralab oldi.

Yigʻilgan maʼlumotlar bazasi asosida Karpaty interfeysi YouTubeʼni eslatuvchi HackerTube xizmatini yaratdi. Unda shaxsiy tavsiyalar, «Siz uchun» boʻlimi, tezkor tugmalar yordamida boshqarish va roʻyxatdan oʻtmasdan afzalliklarni saqlash imkoniyati bor. Videolar uchun mualliflar tayyorlagan muqova rasmlari oʻrniga roliklarning oʻrtasidan olingan kadrlar ishlatiladi.

Ishlab chiquvchining soʻzlariga koʻra, ishning asosiy qismini Claude Code bajargan: maʼlumotlarni qayta ishlash va kod yozishdan tortib, xavfsizlikni sozlash hamda saytni serverga joylashtirishgacha. Karpatyning oʻzi esa API kalitini yaratish, serverni ishga tushirish va domenni roʻyxatdan oʻtkazish bilan cheklangan.

Butun tajribaga qariyb ikki soat ketdi. Ishlab chiquvchi bu tajribani sunʼiy intellekt dasturiy mahsulotlarni yaratish jarayonining oʻzini qanday oʻzgartirayotganiga yana bir misol deb hisoblaydi: inson kodni bevosita yozish oʻrniga vazifalarni belgilaydi va AI yordamchisining ishini boshqaradi.