Meta Instagramʼdagi AI asosidagi yoshni aniqlash texnologiyasini global kengaytirmoqda

Meta Instagramʼda yoshni baholash texnologiyasini global miqyosda kengaytirayotganini maʼlum qildi. Kompaniya roʻyxatdan oʻtishda kattalar yoshiga mos tugʻilgan sanani koʻrsatgan boʻlsa ham, oʻsmir deb hisoblaydigan foydalanuvchilarni topish uchun AIʼdan foydalanadi. Meta bayonotiga koʻra, bu yana millionlab oʻsmirlar uchun Teen Accountʼning ichki cheklovlarini joriy etish imkonini beradi.

Bunday akkauntlarda oʻsmir bilan kimlar bogʻlana olishi, unga koʻrinadigan kontent va ilovadan foydalanish vaqti avtomatik cheklanadi. Jumladan, foydalanuvchilar faqat oʻzlari kuzatadigan yoki avvaldan aloqada boʻlganlardan xabar oladi, ehtimoliy zararli izohlar esa yashiriladi; akkauntlar sukut boʻyicha yopiq boʻladi.

Yoshni baholash uchun Meta profil kontekstini tahlil qiladi: postlar, izohlar, biografiya va postlarga yozilgan taglavhalardagi tugʻilgan kun, maktab sinflari haqidagi eslatmalar hamda boshqa signallarni oʻrganadi. Kompaniya fotosuratlar va videolardagi vizual belgilarni, jumladan boʻy va suyak tuzilishini ham hisobga oladi.

Reklama

Meta bu texnologiyani Facebookʼda ham joriy etishda davom etmoqda, Threadsʼdagi shunga oʻxshash global ishga tushirishni esa shu yilning keyinroq davrida boshlashni rejalashtirmoqda. AQShda ota-onalar shu oy Instagram lentasida kompaniyaning yosh cheklovlariga yondashuvi tushuntirilgan videoni koʻra boshlaydi.

Kengaytirish Meta kompaniyasining AQSh shtatlari, hududlari va Kolumbiya okrugining 52 bosh prokurori bilan tuzgan kelishuvi bilan bogʻliq. Kelishuv doirasida kompaniya 13 yoshdan kichik bolalarga tegishli boʻlishi mumkin boʻlgan akkauntlarni aniqlash, shuningdek, 13–17 yoshdagi va tugʻilgan sanasida kattalar yoshini koʻrsatgan foydalanuvchilarni topish vositalarini kuchaytirmoqda.