Proximal Ventures jamgʻarmasi farmatsevtikada sunʼiy intellektni rivojlantirishga $27,5 mln yoʻnaltiradi

Proximal Ventures asoschisi Sahir Rauf ilk jamgʻarmasini kapitalni birinchi marta jalb qilayotgan jamgʻarma boshqaruvchilari uchun bozor murakkab boʻlgan bir paytda yigʻdi. Bungacha u SignalFireʼda investor boʻlib ishlagan, ikkita tibbiy startapda rahbarlik lavozimlarini egallagan hamda Iterative Health va Flatiron Health kompaniyalarida biznesni rivojlantirish uchun masʼul boʻlgan.

Jamgʻarma pre-seed va seed bosqichlaridagi kompaniyalarga investitsiya kiritmoqchi. Bitta investitsiya miqdori $500 000 dan $1,5 mln gacha boʻladi. Proximal Ventures allaqachon oltita startapni qoʻllab-quvvatladi. Ular orasida OpenAIʼning sobiq rahbari Fidji Simo hammuassisiga aylangan ChronicleBio ham bor. Kompaniya surunkali kasalliklarni oʻrganish va ehtimoliy davolash usullarini izlash uchun biologik hamda tibbiy maʼlumotlarni tahlil qilishda sunʼiy intellektdan foydalanadi.

Raufning fikricha, sunʼiy intellekt farmatsevtika kompaniyalari hozirda ixtisoslashgan pudratchilarga topshirayotgan vazifalarning katta qismini avtomatlashtirishi mumkin. Bunga molekulyar birikmalarni sintez qilish, dori vositalari ishlab chiqarishini kengaytirish va klinik tadqiqotlar maʼlumotlarini tahlil qilish kiradi. Uning bahosiga koʻra, startaplar farmatsevtika sanoatining xarajatlaridan foydalanish imkoniga ega boʻlib, bunday xizmatlarni arzonroq va tezroq koʻrsatishi mumkin.

Jamgʻarma investorlari qatoridan SignalFire, Kleiner Perkins, Bertelsmann Healthcare Investments, shuningdek, Dimension Capital hammuassislari Nan Li va Zavain Dar oʻrin olgan. Highlander Health hammuassisi va FDA komissarining sobiq oʻrinbosari Emi Aberneti ham jamgʻarmaga mablagʻ kiritgan. U Raufning biznes aloqalarini yoʻlga qoʻyish va sogʻliqni saqlash tizimidagi muammoli nuqtalarni aniqlash borasidagi tajribasini qayd etdi.