Microsoft oʻyinlar yaratishda sunʼiy intellektdan foydalanadi, ammo tafsilotlarni oshkor qilmayapti
Microsoftʼning oʻyinlar boʻlinmasi strategiyasi boʻyicha menejeri Brendon Stirrapning aytishicha, Xbox allaqachon oʻyinlar yaratishda sunʼiy intellektdan foydalanmoqda. Uning soʻzlariga koʻra, boshqa ishlab chiquvchilar ham shunday qilmoqda.
Stirrap Xʼda Microsoftʼning oʻyinlar boʻlinmasi oʻyinlarni ishlab chiqishda sunʼiy intellektdan foydalanayotganini maʼlum qildi. Uning soʻzlariga koʻra, foydalanuvchilarning salbiy munosabati sababli soha yangi texnologiyalarga oʻtishni kechiktirmoqda va ulardan foydalanilayotgani haqida har doim ham ochiq gapirmaydi. Keyinroq menejer ijtimoiy tarmoqdagi akkauntini oʻchirib qoʻydi.
Oʻtgan oy Microsoft sunʼiy intellekt yordamida oʻyinlar remikslarini yaratish boʻyicha tajribalar oʻtkazishga moʻljallangan Xbox Labs loyihasini ishga tushirdi. Ishlab chiquvchilar, muhandislar va olimlardan iborat kichik guruh oʻyin gʻoyalarining prototiplarini, jumladan, eski oʻyinlarni dekompilyatsiya qilish va qayta kompilyatsiya qilish boʻyicha tajribalarni yaratishi kerak.
Microsoft hozircha neyron tarmoqlardan foydalangan holda oʻyinlar ishlab chiqishga munosabatini rasman eʼlon qilmagan. Shu bilan birga, Capcom, Square Enix, Sega, Nexon, Activision va boshqa noshirlar allaqachon sunʼiy intellektdan foydalangan yoki bunday rejalarini bildirgan, Epic Games esa sunʼiy intellektning qoʻllanilishi haqida ochiq gapirmoqda. Tadqiqotlar oʻyin sanoatida sunʼiy intellektning tarqalganlik darajasini taxminan 90 foiz deb baholaydi, biroq bu tadqiqotlar ishtirokchilar sonining kamligi va sunʼiy intellektga berilgan taʼriflarning turlicha ekani bilan cheklangan.
