Tadqiqot: AI-chatbotlar soxta saytlarni tavsiya qiladi

Mualliflar ChatGPT, Gemini va Perplexityʼning 151 ta brend boʻyicha xaridga oid beshta savolga javoblarini tekshirdi. Savollar rasmiy va mintaqaviy saytlar haqidagi soʻrovlarni ham qamrab oldi. Sinov 2026-yil sentabrida ikki bosqichda oʻtkazildi: jami 6 795 ta javob va 4 437 ta domen oʻrganildi.

Xavfli deb brendga taqlid qiluvchi, qalbaki mahsulot sotishi mumkin boʻlgan yoki faol boʻlmagan saytlar hisoblandi. Bunday manzillar Perplexity javoblarining 15 foizida, ChatGPT javoblarining 8 foizida va Gemini javoblarining 4 foizida uchradi. Oʻrtacha chatbotlar xavfli saytni xarid qilish joyi sifatida shunday javoblarning 57 foizida tavsiya qilgan, 34 foizida uni izohsiz tilga olgan, atigi 9 foizida esa ogohlantirgan.

Eng muammoli savollar brendlarning mintaqaviy saytlari haqidagi savollar boʻldi: xavfli manzil javoblarning 16 foizida paydo boʻlgan. Tizimlar baʼzan brendning umuman mintaqaviy doʻkoni boʻlmagan mamlakatlar uchun saytlarni koʻrsatgan. Tadqiqotga koʻra, 718 ta xavfli domenning 351 tasi qalbaki mahsulotlar bilan bogʻliq, 367 tasi esa faol boʻlmagan. Mualliflar, shuningdek, ikkinchi bosqichda bunday javoblar ulushi 12 foizdan 7 foizgacha kamayganini qayd etdi.