Opera WebAIʼni taqdim etdi — endi brauzer sunʼiy intellektni bulutsiz, bevosita kompyuterda ishga tushira oladi

Opera WebAIʼni modellarni bevosita brauzerning oʻzida lokal ishga tushirish standarti sifatida taqdim etdi. Texnologiya muayyan arxitekturaga bogʻlanmagan va ochiq vaznli tizimlarni, jumladan Googleʼning yengillashtirilgan Gemma modelini hamda Apple chiplariga ega Mac kompyuterlarida oʻrnatilgan Apple bazaviy modelini qoʻllab-quvvatlaydi. Hozirda funksiya Intel yoki AMD protsessorlariga ega 64-bitli Windows kompyuterlarida, shuningdek Apple chiplariga ega Mac kompyuterlarida ishlaydi.

Foydalanuvchi WebAIʼni mustaqil ravishda faollashtirishi kerak, shundan soʻng har bir sayt lokal modelga murojaat qilish uchun alohida ruxsat oladi. Opera bayonotiga koʻra, standart bulutli qayta ishlovsiz matn yaratish, kontentni tasniflash va maʼlumotlarni taqqoslash imkonini beradi. Ishlab chiquvchilarga oʻz infratuzilmasini yaratish, foydalanuvchilarga esa sunʼiy intellekt xizmatlariga obuna rasmiylashtirish talab etilmaydi. Biroq lokal qayta ishlov kompyuterga tushadigan yuklamani oshiradi va uning xususiyatlariga bogʻliq boʻladi.

Yaqin vaqt ichida shunga oʻxshash imkoniyatlar Opera GX va Opera Neonʼda ham paydo boʻlishi kerak. Shu bilan birga, Opera interaktiv veb-sahifalarni ikki va uch oʻlchamli sahnalarga joylashtirish uchun HTML-in-Canvas eksperimental standartini taqdim etdi. Sahifa virtual makonda koʻchirilganida ham tugmalar, menyular va shakllar ishlashda davom etadi; buni virtual 3D xonaning interaktiv displeylarida saytlar namoyish etilgan Gamer Room loyihasi koʻrsatib berdi.