Google ishlab chiquvchilarga ilovalarni Gemini va Searchʼga ulash imkonini beradi

Google oʻz servislarini Gemini va Google Searchʼga ulashni istagan kompaniyalar va ishlab chiquvchilar uchun Connected Apps Platform platformasini taqdim etdi.

Integratsiya uchun ishlab chiquvchilar AppFunctions API orqali ilovani bulutdagi MCP-serverga yoki Android MCPʼga ulaydi, soʻng uni Google Connected Console orqali roʻyxatdan oʻtkazadi, sinovdan oʻtkazadi va yuboradi. Kirish imkoniyatini Search, Gemini ilovasi yoki har ikki mahsulot orqali berish mumkin. Ilova eʼlon qilingach, ishlab chiquvchilar trafik, kechikish va xatolar chastotasini kuzatishi, shuningdek, tasdiqlangan logotiplar va autentifikatsiyadan oʻtgan akkauntlarni boshqarishi mumkin boʻladi.

Google maʼlumotlariga koʻra, hozirning oʻzida Geminiʼda Adobe, Experian, Localiza va Peloton servislarini ham oʻz ichiga olgan 50 dan ortiq ulangan ilova mavjud. Ular yaqin bir necha hafta ichida Google Searchʼda ham paydo boʻlishi kerak; Calm ilovasi esa keyinroq Gemini va Searchʼda bir vaqtning oʻzida ishga tushiriladi.